Besta leiðin til að hita heilsárshús ræðst fyrst og fremst af því hvað er í boði á staðnum. Ef hitaveita er í boði er hún yfirleitt ódýrasti kosturinn. Án hitaveitu er rafmagn algengast, eitt sér eða með varmadælu. En sama hvaða leið þú velur skiptir einangrun hússins mestu.
Hitaveita
Hitaveita er heitt vatn úr jörðu sem er leitt í húsið. Það hitar ofna eða gólfhita og neysluvatn.
- Kostir. Yfirleitt ódýrasti hitinn og þægilegur, jafn hiti.
- Gallar. Ekki í boði alls staðar. Heimtaugargjald getur verið hátt þegar langt er í næstu leiðslu.
Rafmagnshitun
Á svæðum án hitaveitu er rafmagn algengast. Hitinn getur komið úr rafmagnsofnum, rafmagnsgólfhita eða hitamottum.
- Kostir. Einföld lagning, lítið viðhald og hægt að stýra hverju herbergi fyrir sig.
- Gallar. Rekstrarkostnaður getur verið hærri en með hitaveitu, sérstaklega í stærri húsum.
Varmadæla
Varmadæla býr ekki til hita heldur flytur hann. Hún tekur varma úr útiloftinu, líka þegar kalt er úti, og notar rafmagn til að flytja hann inn í húsið. Þess vegna skilar hún meiri hita en hún notar af rafmagni, oft tvisvar til þrisvar sinnum meiri. Í miklu frosti er minni varmi í loftinu og þá dregur úr afköstunum.
- Kostir. Getur lækkað rafmagnsnotkun til hitunar verulega í húsi án hitaveitu.
- Gallar. Kostar meira í upphafi og afköst minnka í miklu frosti.
Hitunarleiðirnar í töflu
| Hitaveita | Rafmagn | Varmadæla | |
|---|---|---|---|
| Hvar | Þar sem hitaveita er í boði | Alls staðar | Alls staðar |
| Stofnkostnaður | Heimtaugargjald | Lágur | Hærri |
| Rekstur | Yfirleitt lægstur | Hærri | Lægri en beint rafmagn |
| Viðhald | Lítið | Lítið | Reglulegt eftirlit |
Einangrun skiptir mestu
Vel einangrað hús með góðum gluggum þarf minni orku, sama hvaða hitunarleið er valin. Þess vegna eru KUBO húsin með þrefalt gler og mjög góðri einangrun í veggjum, gólfi og þaki. Nánar um muninn á einangrun í greininni Heilsárshús eða sumarhús.
Hvernig eru KUBO húsin hituð?
KUBO húsin koma með innrauðum rafmagnsgólfhita og tenglum fyrir rafmagnsofna í hverju herbergi. Í miklum kuldaköstum dugar innrauði gólfhitinn ekki alltaf einn og sér sem aðalhitun, og þá þarf aðstoð rafmagnsofna. Þess vegna mælum við með því að velja vatnsgólfhita þar sem hitaveita er í boði, eða varmadælu eða afkastameiri rafmagnsgólfhita þar sem hún er ekki. Ef þú velur annan gólfhita er verðmæti innifalda kerfisins dregið frá. Undir húsinu eru tengistútar fyrir vatn og frárennsli, og fyrir hitaveitu þar sem það á við.
Algengar spurningar
Hvað er ódýrast að hita heilsárshús með?
Yfirleitt hitaveita, ef hún er í boði. Án hitaveitu getur varmadæla lækkað rafmagnskostnaðinn.
Er rafmagnsgólfhiti dýr í rekstri?
Það fer eftir stærð hússins, einangrun og rafmagnsverði. Í vel einangruðu, minna húsi er hann oft góður kostur.
Þarf að hita húsið þegar enginn er þar?
Já, að vetri þarf að halda lágmarkshita svo lagnir frjósi ekki og raki safnist ekki fyrir.
Get ég skipt um hitakerfi síðar?
Það er hægt, en einfaldara er að velja rétt kerfi áður en húsið er smíðað.
Næsta skref
Segðu okkur hvort hitaveita er í boði á lóðinni þinni. Við förum yfir hitunarleiðirnar með þér og gerum tilboð í þá lausn sem hentar, áður en húsið fer í framleiðslu.
Fáðu tilboð Skoðaðu KUBO 54Þessi grein er almenn ráðgjöf. Orkusali og pípulagninga- eða rafvirkjameistari geta metið aðstæður á þínum stað.